Camiño Norte: Asturias-Galicia

Grande Obra dos Camiños de Santiago. Iter Stellarum nace co fin de analizar e mostrar de forma global todas as rutas existentes que percorren os peregrinos ata chegar á cidade de Santiago de Compostela, lugar no que se veneran as reliquias do apóstolo Santiago o Maior. O paso dos peregrinos deixou unha profunda pegada de espiritualidade, arte, historia e cosmopolitismo ao longo dese entramado de rutas que son os Camiños a Santiago: desde o Camiño Francés (sen dúbida o itinerario de referencia) ata a Vía da Prata (a segunda gran ruta no tocante á presenza de peregrinos), pasando polo Camiño Portugués, o Primitivo, o Norte, o Inglés, ademais da ruta do Mar de Arousa e Río Ulla, para acabar no Camiño de Fisterra-Muxía (a senda á antiga fin da terra"). Así pois a tumba do Apóstolo desempeñou un papel integrador único, transformándose en forza catalizadora dun influxo cultural de enorme transcendencia grazas á confluencia dunha fascinante mestura de historia, raíces, tradición e modernidade. Hoxe en día os Camiños de Santiago son un referente para o mundo enteiro, non en van convertéronse no maior sinal de identidade cultural de Galicia."